Kvæði um mánuðina, eins og farið

var með það að Bæjum á Snæfjallaströnd

--------------------------------------

Mörsugur á miðjum vetri

markar spor í gljúfrasetri

Þorri hristir fannafeldinn

fnæsir í bæ og drepur eldinn

Góa á til grimmd og blíðu

gengur í éljapilsi síðu

Einmánuður andar nepju

öslar snjó og hendir krepju

Harpa vekur von og kæti

vingjarnleg og kvik á fæti

Skerpla lífsins vöggu vaggar

vitjar hrelldra, sorgir þaggar

Sólmánuður ljóssins ljóma

leggur til og fuglahljóma

Heyannir og hundadagar

hlynna' að gæðum fróns og lagar

Tvímánuður allan arðinn

ýtum færir heim í garðinn

Haustmánuður hreggi grætur

hljóða daga, langar nætur

Gormánuður grettitetur

gengur í hlað og leiðir vetur

Ýlir ber er byrgist sólin

brosa stjörnur, koma jólin.

(Arnþrúður Kaldalóns fór með

kvæðið svona þann 1.1.1996.)

Með hverjum mánuði hefst tiltekinn dagur,

skv. Almanaki Þjóðvinafélagsins 1996:

Mörsugur Jóladagur 25. desember

Þorri Bóndadagur 25. janúar

Góa Konudagur 25. febrúar

Einmánuður Góuþræll 25. mars

Harpa Sumard. fyrsti 25. apríl

Skerpla Hvítasunna 26.5. 25. maí

Sólmánuður Jónsmessa 24. júní

Heyannir Miðsumar 28. júlí

Tvímánuður Höfuðdagur 29.8. 27. ágúst

Haustmánuður Haustjafndægur 22.9. 26. september

Gormánuður Fyrsti vetrardagur 26. október

Ýlir Katrínarmessa 25. nóvember

_